Mirë se vini në Shkollën 9-vjeçare Shqitas (Çaushli)

Pak histori për shkollën Shqitas

Shkolla në fshatin Shqitas (Çaushli) është hapur në vitin 1919 nga mësuesi i parë i këtij fshati, Ali Gjata. Pavarësisht kushteve të vështira të kohës, mësimi zhvillohej rregullisht në shtëpitë e fshatarëve. Për fat të mirë, mësuesi i pasionuar Ali Gjata ishte nga ky fshat dhe gëzonte një ndikim të madh në komunitet, duke qenë njëkohësisht edhe bashkëluftëtar i Themistokli Gërmenjit.

Më 1919, pas shumë përpjekjeve arriti të hapë në fshatin e tij të lindjes Çaushli, të parën shkollë në fshat me dy dhoma në shtëpinë e Refat Keti. Aty mësonin shkrim dhe këndim rreth 40 djem nga fshatrat Çaushli, Pirg, Kakac, Veliternë dhe Zvirinë. Hapja e kësaj shkolle të parë në Çaushli ishte një ngjarje e shënuar dhe me vlera të mëdha për kohën, prandaj u mirëprit dhe u ndihmua nga të gjithë. Një vit më vonë, mësuesi Ali Gjata hapi shkollën e parë në fshatin Kakac, në shtëpinë e patriotit Hajredin Fasho, ku mësuesi i palodhur përgatiste të hapte shkolla të tjera në Gorë. Masat për arsimin u zbehën dhe regjimi i Ahmet Zogut nuk bëri përpjekjet e nevojshme për shtimin e konsolidimin e shkollave; përkundrazi mbylli rreth 60% të shkollave me sloganin absurd të “superinteligjencës”. Këtë fat patën edhe shkollat e Gorës; shkollat e Çaushlisë dhe të Kakacit u mbyllën të parat.

Pas çlirimit të vendit, shkolla filloi të funksiononte në ndërtesën e vjetër pranë bregut, e cila më vonë u zgjerua në dy godina. Megjithëse ishin të vogla, ato arritën të strehojnë një numër gjithnjë e më të madh nxënësish — nga 18 nxënës në fillim, në 47 nxënës vetëm në ciklin fillor.

Pas vitit 1995, shkolla e Çaushlisë vazhdoi si institucion më vete, dhe në këtë periudhë u hap edhe amza e parë. Ndër mësuesit e parë që kanë punuar në këtë shkollë përmenden: Ismail Kodra, Kamberie Osmanaj, Agron Gjata, Njazi Kokojka, Lefterie Dinoshi, etj.

Në vitin shkollor 1970–1971 u çel shkolla 8-vjeçare, me drejtor Vaskë Filipin. Në vitin 1972, drejtimin e shkollës e mori Lefter Kosta, i cili shërbeu deri në vitin 1988.

Në vitin 1987 u përurua dhe nisi mësimi në ndërtesën dy-katëshe që përdoret edhe sot. Kjo godinë shërbente për ciklin e lartë 8-vjeçar dhe furnizohej me nxënës nga dy fshatrat: Çaushli dhe Kakaç.

Deri në vitin shkollor 2002–2003, numri i nxënësve të të dy fshatrave arriti kulmin, ndërsa nga viti 2000 deri në 2025, 457 nxënës kanë marrë dëftesë lirimi.

Mirënjohje e pafund i drejtohet stafit drejtues dhe pedagogjik që ka shërbyer ndër vite në shkollën Shqitas. Gjatë gjithë kësaj periudhe, bashkëpunimi me komunitetin ka qenë dhe mbetet një ndër faktorët kryesorë të suksesit. Ky bashkëpunim është një shtyllë thelbësore për përmirësimin e cilësisë së arsimit, duke u realizuar konkretisht përmes hapjes së shkollës ndaj komunitetit, prindërve dhe palëve të interesuara.

Në vitin 2012, shkolla u rikonstruktua plotësisht, duke u kthyer në një institucion me kushte shumë më të mira mësimore. Në vitin 2015, ajo u pajis me ngrohje qendrore përmes një kaldaje moderne, duke përmirësuar ndjeshëm kushtet e punës dhe të mësimit.

Në këtë shkollë janë zhvilluar një sërë veprimtarish të larmishme jashtëshkollore, të cilat kanë ndihmuar në rritjen e përgjegjësisë, përkushtimit dhe motivimit për të çuar përpara misionin arsimor të këtij institucioni.

Nxjerrë nga: HISTORIKU I SHKOLLËS 9-VJEÇARE SHQITAS